يجوز انسى حياتي ومنسه حبنه
انا وجيوش كلبي منسحبنه
بسلاسل باب كلبك من سحبنه
انفتح بابه ونصر عديته اليه
قائد جيش كلبي والغرام جيوش
وكلبك قلعه واحنه نريد نحتلهه
مجرب ما خسر كل المعارك ذيج
والتاريخ إله بكل زود سجلهه
درع مالبس كلبي ولا حمل سيف
سلاحه الطيبه كلبي هو حاملهه
الوفه عالميمنه وعالميسره الاخلاص
بمفاتيح المحنه اسوار ندخلهه
بثقه كاصد قلعتك لاتحاول دوم
وراية نصر حبك بيده شايلهه
لتغرك اسوارك لو علت ليفوك
السلاسل والقفاله صدك يحلهه
وراداك لحروبه خاتم انت تصير
خبرته وياك كلهه اليوم نزلهه
الشهاده والنصر ثالث فلا موجود
لو يدخل القلعه لو يموت الهه
نفرض مادخل ونال الشهاده وياك
تستاهل عيونك روحه يبذلهه
ولو صار النصر وانهدمت الاسوار
وانفتحت القلعه وصار امير الهه
صدك هذا حلمه وهذا حد الشوف
لو تنهي حياته لو تكملهه
الشاعر
غزوان القرغولي
ليست هناك تعليقات:
إرسال تعليق