ياسمين الشوكَــ

ابشرك ياسمين الشيب..

ازهر والزلف نتكَــ

 من اذكرك مدري ليش العين..

يكصر شوفهه وتعركَـ

وبجيت اعليك دم ابيض 

مامتوارد ويه دموع كل الناس 

بياض عيوني كله انفض 

يعوجيتي بعد شنهض 

بدونك رك جدم ممشاي...

وامشي بخطوة مشبكَـ

يطب ريتي النفس شوغات..

تعرض صورتك واشركَـ

 حامل ريتي بالحسرات ...

تكَضي الليل بس تطلكَـ

ويجي محشم عليه الليل ..

يعزف صوتك بمطبكَـ

وافز مرعوب من نومي.. 

وشم بطارف هدومي.. 

يهلبت عطر من طرواك

 يرد رويحي امن اشهكَــ

 تريد الحكَـ يطاري الماي 

عشت كل عمري الك شراي 

وابد ما رخصتلك سوم 

عيوني براسي موش عيون

 صارت مثل فتحة ناي 

ويمر طيفك هوا بيها 

ويطلع صوتها مبلل 

ويا صوت الشجن بالعين يعزف 

واللحن وشل 

وأرد واسأل 

عجب شايل طبع فلاح 

مسحاتك هجر وفراكَــ ... 

كلما طالت الخطوات ...

جرحك بالكَلب يغمكَــ

وابشرك خاف ماتدري 

خويت اني.. 

وخوه صدري 

واصبح مثل وحشة دار.. 

وكَلبي الصار شبه غراب.. 

وسط الدار ظل ينغكَـ













الشاعر
غزوان القرغولي
أغسطس 2017