أمي حضرت بخت
والمهموم يتعنه ويجيهه
أمي محراب بحضنهه
أمي محراب بحضنهه
نصلي فرض الغيره بيهه
أمي دار أيتام جفهه
شكَد محّنه بجف أديهه
أمي ظلهه يكفي دنيه
والشمس تكَعد بفيهه
أمي من تبجي أعله أمهه
الضحك يبجي لبجيهه
أمي بس أسود لبسهه
وأبد مالايكَـــ عليهه
أمي لو رادت تسولف
ترتوي الكَاع بحجيهه
أمي ما صِرت أني شاعر
لوّن ما سامع نعيهه
لهسه أذكر كلشي كَالت
وحاسب شكم دمعه سالت
أمي من تلّولي جانت
أني بالكاروك أصيح الله عليهه
فدوه روحي تروح الهه
أمي تستاهل نِجلّهه
أمي جنه بجف رجلهه
أمي تزرع جنه كل خطوه بمشيهه
أمي تعشكَـــ ظِل أبوي
هو خيمتهه ووليهه
تزاعل الدنيه إعله زعله
وترضه من يبتسم ليهه
31/يناير/2015
الشاعر
غزوان القرغولي
ليست هناك تعليقات:
إرسال تعليق