يا نيوتن أسف آنه

حبي الج مو حب طبيعي حبي مثل اليونسيف


هي بس ترعى الطفوله.


وحبي ينطيهه الرغيف ويا رغيف..


بي محنه تكفي دنيا


وبي حروره تكفي صيف


بي خضار وجوري أحمر ما يمر بيه الخريف


طاهر وكلش مقدس على الفطره


شكَد شريف


حبي رايه


حبي ثايه..


حبي بي عفة نثايه..


حبي بي غيرة زلم لو طاحت الشيله بمضيف


حبي سر كلش جبير


حبي كلمه بحلكـَ أخرس سولفاهه بأذن بير


حبي ثكَله بكَد أرضنه ولاجن كَليبي يطير


ويا نيوتن أسف آنه


أنكَلبت الأيه بهوانه


وجاذبيتك حيل فشلت حب البكَلبي خطير


اي خطير..


وبي يصير الما يصير


بيه كلما يمر عمري أرجع إبنادم زغير


وبي خشونة كل زماني ناعمه ومثل الحرير















19/نوفمبر/2015

الشاعر
غزوان القرغولي

أَنكَل جدم
يوكَع حلم
وسنيني يمه طشرت
يحبيبه غيرج من يلم
يا يمه والموت الخذج
مايدري ما أحمل يتم
هنياله يا يمه الجفن
مدفون وبعطرج يشم
كل يوم بغيابج يمر
سافين من عمري يَهَدَمْ
وزغير خلكَي بغيبتج
يا يمه وهمومي زلم
يمه الوشيعه تخلبصت
والراس بيدج والعلم








4/أبريل /2015
الشاعر غزوان القرغولي

https://www.facebook.com/profile.php?id=100005049313633&fref=ts 

شيلة أمــــــــي

نور الشمس أمي شيلم امي

ليل الستر ناسج شيله لأمي

الهي نظر عيني شيله لامي

إشفيهه ودير كل الداي بيه

21/يناير/2015

الشاعر 

غزوان القرغولي

ما خنتك وحكَــــ ..عطرك

ما خنتك وحكَـــ عطرك 

تركت أنفاسي يم شعرك

تركت جفوفي ملفوفات 

مثل حزام لف خصرك

تركت برودتي بملكَاك

أخذت الدفو من صدرك

تركت النوم شنهو النوم

صرت أتسلى وي سهرك

نظر عيني علن إضراب

على كلشي حلو بهجرك

الولي لروحي تالي الليل

أنومهه ويفز ذكرك

وكَلبي الصارلك صندوكَــــ

ترى لليوم ضم سرك

العسل مضرب مثل للناس

ما يوصل عشر مُرّك

زرعت عيوني وردة شوكَـــ

ذبلت كثر ما نطرت

يمر بيهه الفراش أشكال

لا هزهه ولا نظرت

يبلسم عندي كومه جروح

بفراكَك شكَد صبرت

أصبرهه بأمل ملكَاك

مر ملح الهجر فرت

تفر فرت حمامة دوح

لو صياد إجه حسّت

تعال بروحي جلجل ليل

وغيوم البُعد مطرت

تعال أنطيني ومضة نور

سفينة بلا ضوه وبحرت

الشاعر 

غزوان القرغولي 

أمــــــــي...

                                 
أمي حضرت بخت 

والمهموم يتعنه ويجيهه
أمي محراب بحضنهه

نصلي فرض الغيره بيهه

أمي دار أيتام جفهه

شكَد محّنه بجف أديهه

أمي ظلهه يكفي دنيه

والشمس تكَعد بفيهه

أمي من تبجي أعله أمهه

الضحك يبجي لبجيهه

أمي بس أسود لبسهه

وأبد مالايكَـــ عليهه

أمي لو رادت تسولف

ترتوي الكَاع بحجيهه

أمي ما صِرت أني شاعر

لوّن ما سامع نعيهه

لهسه أذكر كلشي كَالت

وحاسب شكم دمعه سالت

أمي من تلّولي جانت

أني بالكاروك أصيح الله عليهه

فدوه روحي تروح الهه

أمي تستاهل نِجلّهه

أمي جنه بجف رجلهه

أمي تزرع جنه كل خطوه بمشيهه

أمي تعشكَـــ ظِل أبوي

هو خيمتهه ووليهه

تزاعل الدنيه إعله زعله

وترضه من يبتسم ليهه

31/يناير/2015

الشاعر 

غزوان القرغولي

https://www.facebook.com/profile.php?id=100005049313633

ابوذيات

أصيح الآه من حبه ويجر آه

ويجر الروح احسنه ويه جراه

مثل الراعي عشرتنه ويه جراه

...

جمعته سنين وتبده من إديه

@@@@@@

مناطر وأندعي هلالك يهل كون

عسى اللي أخرو جيتك يهلكون

شوساعة ومن غبت عني يهالكون

مثل فتحة الأبرة صار اليه

16/ يناير /2015

الشاعر

غزوان القرغولي

تفضحني المشاعر ..!

　

أريد أغركَــ بحضنك حد رفيف الروح **وأريد آخر نِفس بنفاسك أشتمه

وأريدن كون أتيه بشعرك المنثور** يدليني العطر ما أخاف بالظلمه

مرر حاجبك عالنحر مثل السيف** راح تشوف أسمك يطلع بدمه

أريد أكَصد بحر عينك بدون شراع **بمد وجزر رمشك طشره ولمه

أريدن من كَطن خَدَّك جِفن منسوج** حتى الموت يصبح للجسم حلمه

بثغرك جاذبية تشدني وإني ضعيف **لون التوت لونه وبالعسل طعمه

يا غيمة حِسن عطشانة عين الناس** المبلل بحسنك مطر ماهمه

يالثكَلك جبل بس شوكَي إلك زلزال **نص رختر بشوكَي حجارك يهدمه

بقانون العمر تختلف عن الناس** أنت تقل سنة من عامك أتمه

علمني الوصل عالفركَة ماظل حيل** اليتيم أعلّه البواجي أرجوك لتعلمه

مرات بدلالك مثل إبن سنتين** بعطف والد أصيرله وحنان أمه

تفضحني المشاعر لمن أحجي وياك **وجنت قبلك لغز ما واحد يفهمه

أنا الناثر عيوني بدربك أتانيك **وأنا موّصي الدرب بهِداي ويّ جِدمه

أحضرلك سوالف من يمرني الليل** الصبح لو ردت أسولف ماعرف كلمه

وتودعني حضرتك بالسلامة تكَول** هو الفاركَك مدكَلي شيسلمه

من نفاركَـــ عزيز نطش وراه ماي** أنا الطشيت حيلي وما بقت همه

2015/10 /يناير

الشاعر

غزوان القرغولي

 

　

شلون أنساك ..!

وآنه من الألف للياء صرت أهواك

عشت بصحره عمري وبيهه شفت ضواك

ظلمة بدون شوف وجيتك أتعناك

   

   دربك صح صعب بس كلبي راد وياك

حلم أنت جبير وبالي ما كفاك

ظلمه ونور أشوفك وجهك ومكفاك

إذا أنت الكَمر لا تبعد أترجاك

يالكل الحروف أحتارت بمعناك

ياأجمل قصيدة ولو ردت أقراك

يالعطرك أشمه بدون ما أدناك

يانسمة هوا ترد روحي بملكَاك

بلون الورد ربك صاغك وسواك

وتغار الحدايق من يمر طرواك

يل حتى البلابل صاحت شمحلاك

شحلات العسل بس ماوصل طعم شفاك

ترافة نده البيك وغصني كله أشواك

كَبل ماكَلت أحبك طر فجر فركاَك

بسكَف راسي وشم مطبوع ذكراك

اذا ساكن براسي شلون أنساك

7/يناير

2015

الشاعر

غزوان القرغولي