الثلاثاء، 31 ديسمبر 2013

والى والدي العزيز











والى والدي العزيز



اتوضه انه بوفه... وسجادتي من صبر

اذن فرض والدي...وكبّر اذان الشعر

وحروفي يتيممن...بتراب جدمه العطر

اسمك سفر دنيتي... وحروفي صلّن قصر

اي قصّرن بالفعل...صلّن الك بس عمر

عمرين ما وفي الك... من المهد للگبر

شرد اوفي يا والدي...ودين العليه شكثر

خوفك؟ محبتك الي؟...سهرك وحني الظهر؟

شمعه وضويت الدرب...جفنك اليامى سهر

صوتك امان وامن...وطولك مهابه وگدر

وشفافك انت جرف...ولسانك احلى نهر

لو گلت يبني ارتوي...وبغصاني يطلع زهر

بعينك اشوف الصدگ...واسمع حجي مو نظر

يالنظرتك تختلف ....بيهه تميز البشر

وظلك يظل يستظل...بيه ويلوذ الشجر

تبقى انت شامخ جبل...وابقى آنه يمك حجر

ورماد انه بحضرتك...وافتخر اصلي جمر

والكرم من ينذكر...بسمك اظل افتخر

من حقي آنه افتخر غير الكرم صاحبك




وآنه نشدت الكرم ياهو اكرمك صاحبك( صاح ابوك)
للضيف ما غمضت جفنك يظل صاحبك(صاحي بيك)
وبابك ابد منقفل خافن يجي گاصدك
والعوز ابد ما گدر عن الكرم گاصدك(گص ايدك)
وتعرگ جفوفك خجل چا ايد لو گاصدك( گصه ايدك)
ولساني اگصه وعلي....لو فخر ما صاح بك







30/ ديسمبر/2013

الشاعر 
غزوان القرغولي 


ليست هناك تعليقات:

إرسال تعليق