الرباب تنوح ..
وتفت الروح..
وتنادي ياكَمر عيدي..
يعبد الله يماي العين ..
يبني وشمعة سنيني..
تانيتك ييمه بشوكَـــ..
وأنطر يانظر عيني.. وحسبتك تغسّل أمك
وتجفّني وتواريني..
وحسبت حساب يا..الأصغر من أكبر تباريني..
أنشده بالي..المهد خالي..ورحت يايمه من أيدي..
ياريت السهم من صاب نحرك ليه صوبني!
ويريت الموت وافاني كَبل ماتنذبح يبني!
ويريت العين معميه ولا أشوفك رحت عني!
ولا شوف المهد خالي.. وأصيح وما تجاوبني
خذاك البين..
ينور العين..
يصبر أمك ويوحيدي
ربيتك وأطلبك دين وريدك..
توّفي بديني أريد أكَضي العمر وياك ..
أناغيك وتناغيني
وما حسبت تاليهه آنه أمك تخليني..
وعطشانه أظل بعدك وبس شوفتك ترويني
وسهم نحرك..
ذبح أمك..
ومتت وياك يوليدي
وحسرة فركَتك يبني مثل النار تجويني
وأخبرك عن أبوك حسين يمه وحاله ياذيني..
يوم اللي وكَف حيران ما بينك وما بيني..
يردلي بيك لخيامي ولحالك يراويني
أنكسر ظهره..
نفذ صبره..
ورجعلي بدونك عضيدي
صواويني صفت وحشه وما تنطب صواويني
وحليبك من يدر يمه يذكرني ويبجيني
وزماني الفاركَك عني عساه وياك يجمعني
وحزن الكَلب ما يخلص..
ولموتي يظل حزني!!
خادم أهل البيت
الشاعر
غزوان القرغولي
